Radio CPI Virxe da Cela
No CPI Virxe da Cela de Monfero (A Coruña) descubriron a radio gracias a uns obradoiros que lles ofreceron vai xa para cinco anos, e dende entón o éxito entre o alumnado foi tan grande que non pararon.
Ainda que lle andan a procurar un novo nome, o proxecto xa é unha parte máis do centro e non teñen pensado deixar de traballar con ela.
A radio do Virxe da Cela é a protagonista do cuestionario a queimarroupa para radios escolares. Aquí o tedes:
ESPORA: Como se chama a vosa radio?
Camino Pereiro González: Radio CPI Virxe da Cela, temos pendente facer un concurso no que elixamos outro nome máis curto.
E: Canto tempo ten?
CPG: Case 5 anos, arrancou a principios de 2013.
E: Seguen no centro as persoas que a montaron?
CPG: Si.
E: Como xordeu a idea de montar unha radio escolar?
CPG: Sergio Pascual e Lucía Abarrategui (Laboratorio de Radio), especializados no medio, propuxéronnos un obradoiro. Vendo o impacto da actividade no alumnado e no centro, decidimos darlle continuidade xa que consideramos que a radio fomenta as habilidades comunicativas, supón unha motivación para o alumnado e permite traballar calquera temática dun xeito divertido e didáctico.
E: Usádela en todos os departamentos?
CPG: Si, a radio no CPI Virxe da Cela é unha canle que permite á comunidade educativa reflexionar e difundir os proxectos do centro. Tentamos darlle á radio unha visión interdisciplinar, que implique a todo o colexio dun xeito ou outro.
E: E en todos os cursos?
CPG: Facemos radio con toda primaria e con 1º de ESO. Noutros anos tamén temos traballado con toda ESO e, puntualmente, con Infantil.
E: En cales credes que funciona mellor?
CPG: En xeral a radio funciona ben. Non depende tanto da idade, senón das características do grupo.
E: Cal é en xeral a resposta do alumnado a aparición desta ferramenta no centro?
CPG: Fíxose un traballo de investigación no que a maioría do alumnado amosou interese pola actividade, manifestando que repetirían e, o que consideramos aínda máis relevante, é que o alumnado aplica o aprendido na radio, noutros eidos da escola e da vida.
E: Cales son os beneficios que lle aporta o uso da radio ao voso centro?
CPG: A construción dun proxecto colectivo no que o protagonista é o alumnado, aumenta a capacidade crítica, a potenciación da creatividade, o reforzo da autoestima, o tratamento das habilidades sociais e cívicas, a mellora das habilidades comunicativas, a dinamización da biblioteca escolar, etc.
E: Que diferencias notades con antes, cando non a tiñades?
CPG: Ademais dos cuestionarios ao alumnado, fixéronse entrevistas ao profesorado na que salientaban que a radio na escola mellorou a escoita activa, a mellora da capacidade oral e escrita, o traballo cooperativo, a toma de conciencia do son e do silencio, o coñecemento do funcionamento dos medios de comunicación, o fomento do debate, a posta en diálogo de diferentes cursos, o fomento da normalización lingüística, etc.
E: Hai algunha experiencia didáctica que fora especialmente importante con ela?
CPG: Si, o pasado ano realizamos unha actividade interxeracional de radio, na que novos e maiores traballaron de xeito cooperativo o tema do patrimonio cultural inmaterial.
E: Suxerídesnos algunha actividade que funcione especialmente ben nela?
CPG: A radio necesita dúas cousas: implicación e creatividade. Calquera cousa que emerxa de aí, funcionará.
E: Como vos organizades para traballar?
CPG: Traballamos por cursos. Cada grupo é como unha redacción na que se preparan os temas a tratar coa axuda e coordinación do profesorado e o Laboratorio de Radio.
E: Tedes unha programación fixa?
CPG: Non, imos traballando os temas en función das necesidades e intereses que vaian xurdindo dende a comunidade educativa.
E: Emitides en directo ou traballades con podcast?
CPG: Elaboramos podcast, a través de pezas individuais ou programas temáticos.
E: Emitides nalgún momento da xornada escolar?
E: As veces, facemos programas abertos ao resto do cole, no que asisten convidados e pode asistir calquera persoa da comunidade educativa.
E: Tedes un equipo específico de xente adicada a organizar as actividades de Radio?
CPG: Si, Laboratorio de Radio, formado por Lucía Abarrategui e Sergio Pascual, comunicadores especializados no eido radiofónico.
E: Tedes algunha asignatura vinculada específicamente á radio?
CPG: Non, o que procuramos é que todo o alumnado teña a oportunidade de pasar polos micrófonos, traballando diferentes cuestións que poden estar vencellladas a un proxecto de centro, a unha matería en cuestión ou unha efeméride como por exemplo foron as ficcións sonoras e programa especial do 25 de novembro, Día Mundial contra a Violencia de Xénero.
E: Cales foron as maiores dúbidas -se é que existiron- que vos xurdiron cando montastes a radio ou cando empezastes a traballador nela?
CPG: Os docentes non temos que saber de todo, polo que a colaboración con profesionais doutros ámbitos, proporciona á escola novas liñas de actuación que enriquecen as aprendizaxes. Contar conSergio e Lucía, do Laboratorio de Radio, fixo que esas dúbidas quedaran resoltas.
E: Tiñades algunha formación específica cando arrincástedes este proxecto didáctico con radio?
CPG: Non.
E: Recomendaríades o uso da radio a xente que está pensando en montar unha radio escolar?
CPG: Por suposto. Cremos que a radio que estimula ao alumnado e que ademais permite fuxir do constante monopolio da imaxe, facendo que a linguaxe sexa outra. Inda que loxicamente a imaxe tamén ten moitas posibilidades na escola. Por exemplo, nós temos un croma no que facemos tutoriais.
E: Cal é actitude do alumnado con respecto ao seu uso na aula?
CPG: Como vos dicía máis arriba a maioría do alumnado non so amosou interese pola actividade, se non que ademais afirmaban que estarían encantados de repetir.
E: Que botades en falta con respecto ao tema da radio tanto no voso centro como noutros centros?
CPG: Co tempo, gustaríanos ter un espazo insonorizado.
E: Parécevos interesante a idea de traballar conxuntamente entre centros que teñan radio?
CPG: Si, de feito xa o fixemos e foi unha experiencia marabillosa que seguro repetiremos.
E: Fixéstelo algunha vez?
CPG: Si, o mesmo grupo que traballou no proxecto interxeracional realizou unha coprodución con Radio Miñoca (CPI Castro Baxoi de Miño), na que abordamos a figura de Carlos Casares. Esta actividade, xunto con outras experiencias, formou parte da bolsa de investigación en Ciencias Sociais outorgada pola Deputación de A Coruña a Lucía Abarrategui.
E: Podemos escoitar os vosos programas na rede?
CPG: Claro, aquí vos deixamos os enlaces do noso blog e a nosa canle de podcasts:
Blogue: http://radioitinerantecreativa.blogspot.com.es/p/cpi-virxe-da-cela-ii.html
Canle de Ivoox: https://www.ivoox.com/podcast-radio-itinerante-cpi-virxe-da-cela_sq_f1102029_1.html
E: Gracias polo voso tempo!
Etiquetas:entrevistas, radio escolar, uso radio escolar
"Trackback" Ligazón dende a túa web.